Kóžde lěto wjesela so dźěći w pěstowarnjach a šulach na serbski nałožk ptačeho kwasa, kotryž so we Łužicy ze zahoritosću pěstuje. 23.01.2026 wopytachu šulerjo a wučerjo našeje šule ptačokwasny program "Kak je hawron ptači kwas zaspał" w Chróšćanskej Jednoće. W programje dožiwichu wopytowarjo znatych rjekow z woblubowanych knihow Jěwy-Marije Čornakec. Běchu to jěžik Kałačik, myška Pip-pip, wroblik Frido, žabka Šlapka, sroka Marta, hawron Juro a dalši. Jěwa-Marija Čornakec je za tutón ptačokwasny program stawiznu napisała. Ptačokwasne předstajenje ze znatymi rjekami a barbojtym jewišćowym wobrazom wopytowarjow zahori. 

Tež w našej šuli su šulerjo 1. lětnika woblubowany nałožk woswjećili a sej słódnu sroku słodźeć dali. Spěwajo ćehnjechu na to hišće přez šulu a so sobušulerjam a wučerjam w rjanej drasće pokazachu. 

Wjesne sportowe hry we Worklecach

Kaž hižo loni přewjedźechmy tež lětsa zaso spočatk šulskeho lěta wjesny sportowy swjedźeń. W předpolu so najprjedy měšane mustwa wulosowachu, tak zo wobsteješe jedyn team z něhdźe 12 čłonami wot prěnjeho do štwórteho lětnika. Cil běše, sportowe stacije we wsy z pomocu kartu namakać a je přewjesć. Stacije běchu najwšelakorišeho razu: Mjetanje medicinoweho bula, slalomowy běh, łaženje na slackline, trojoskok, atd. Wučerki a wučerjo sej stajnje wuslědki cyłeho mustwa notěrowachu a tak so na kóncu tři najlěpše mustwa z medaljemi mytowachu. Zakónčili běchu wšitcy sportowy swjedźeń na kupje z kołbasku w całće, kotruž měještaj sekretarka knjeni Bulankowa a domownik knjez Šiman za wšěch spřihotowanu.

Kóžde druhe lěto předstaja naši wuknjacy staršim a přiwuznym adwentny koncert. Tež lětsa běše ćěłozwučowarnja pjatk wječor zaso kopaće połna a šulerki a šulerjo dóstachu wulki přiklesk za jara poradźeny program. Pod nawodom knj. Hojerec, knj. Cyžoweje, knj. Ošikoweje a knj. Hejdušku su dźěći hodowne tradicije a spěwy po cyłej Europje předstajili. Kaž je nimale hižo z tradiciju, je naša staršiska band tež tónraz zaso wšitke spěwy profesionelnje přewodźała. Za to jim cyle wulki dźak. Dźakować chcemy so tohorunja pola staršiskeje rady, kotraž je so cyły wječor wo napoje a słódnu jědź postarała a zdobyty přinošk po tym šulskej nawodnicy knj. Hejdušcynej přepodała. Rjany dohodowny wječor wostanje wšěm sobuskutkowacym a přihladowarjam zawěsće hišće dołho w pomjatku.