Póndźelu rano, dnja 02.09.24 podachu so šulerki a šulerjo třećeho a štwórteho lětnika do wsy, zo bychu na Michała Hórnika, mjenonošerja swójskeje šule spominali. Hórnik bě so mjenujcy 1.septembra 1833 narodźił, tohodla wotstajichu wuknjacy kaž kóžde lěto mały hornc z kwětkami při jeho pomniku. Wučerka Jadwiga Ošikowa poda so do toho ze wšěmi najprpjedy k jeho ródnemu domjej, w kotrymž hižo lětdźesatki dołho jeje staršej bydlitaj. Njeterec mandźelskaj tež skrótka durje wočiništaj a dźešćom wobrazy wo Michału Hórniku pokazaštaj. Na to hišće někotři šulerjo baseń přednjesechu a wšitcy zhromadnje serbsku hymnu zaspěwachu.

Wjesne sportowe hry we Worklecach

Poprawom chcychu šulerki a šulerjo zakładneje šule “Michał Hórnik” minjeny pjatk w lěsu mjez Handrikec a Lilijowym hatom sportowy swjedźeń přewjesć. Dokelž pak so tam dźěła přewjedźechu a mjez druhim štomy pušćachu, wučerki a wučerjo krótkodobnje sportowy dźeń do wsy přepołožichu. W předpolu so najprjedy měšane mustwa wulosowachu, tak zo wobsteješe jedyn team z něhdźe 12 čłonami wot prěnjeho do štwórteho lětnika. Cil běše, sportowe stacije we wsy z pomocu kartu namakać a je přewjesć. Stacije běchu najwšelakorišeho razu: Mjetanje medicinoweho bula, slalomowy běh, łaženje na slackline, trojoskok, atd. Wučerki a wučerjo sej stajnje wuslědki cyłeho mustwa notěrowachu a tak so na kóncu najlěpše mustwo mytowaše. Běše to cyłk z mjenom “Zaspane sowy”. Druhe městno dźěše na “Mudre liški” a třeće na “Wutrajne Worklečanske wjelki”. Zakónčili běchu wšitcy sportowy swjedźeń wosrjedź wsy z kołbasku w całće, kotruž mějše domownik Roman Šiman za wšěch spřihotowane.

Wulět do Rěčic

Spočatk junija podachmy so cyła zakładna šula na zhromadny wulět do Rěčic. W tak mjenowanym “Ehrlichthof” rozdźělichu wučerki a wučerjo wšěch wuknjacych do dohromady 11 skupinow. Kóžda skupina měješe na to dwě hodźinje časa, wšitke 10 stacijow namakać a wotměnjawe nadawki zmištrować a z tym při kóždej staciji wotpowědnu ličbu namakać. Štóž je sej na kóncu wšitke ličby prawje napisał, je na kóncu swěcu hižo mjenowaneho “Erhlichta” zaso zaswěćił. Dokelž běchu stacije jara zajimawe a wotměnjawe, wjedro wulkotne a přiroda krasna, běše to za kóžde dźěćo jara poradźeny wulět. Na kóncu dósta kóždy hišće mału dopomnjenku na tónle dźeń. 

Na poslednim šulskim dnju do zymskich prózdnin sydachu za šulerkow a šulerjow wězo połlětne informacije. Na třeći lětnik pak čakaše hišće napjaty wokomik, wšako zetka so cyła zakładna šula na hornjej chódbje, zo by dobyćerkow a dobyćerjow serbskeho čitanskeho wubědźowanja mytowała, kiž wotmě so hižo w januarje. Jury, wobstejaca z knj. Hejdušcynej, knj. Ošikowej a knj. Cyžom, bě ze wšěmi přednoškami jara spokojom! Tući šulerki a šulerjo docpěchu sćěhowce zaměstnjenje: 

Rěčna skupina 2+:

1. Emma Zyndźic
2. Miriam Róblec
3. Maximilian Kreuz, Sarah Čornakec

Maćernorěčna skupina: 

1. Luiza Nukec
2. Jette Njekec
3. Maria Nukec, Leon Weclich, Milan Smoła, Hana Ošikec

W poslednim tydźenju do zymskich prózdnin běše w sportowej hali wulki hołk a tołk z kostimami. Dwě hodźinje dołho swjećachu naše šulerki a naši šulerjo póstnicy. Při tym wězo najwjetši čas rejowachu, ale so tež w jednotliwych hrach wubědźowachu. Z něšto plackami, dobrym napojom a wulkim přikleskom za dj-ja Franka Wjeselu ze Šunowa podachu so šulerki a šulerjo zaso do šule!