Kóžde druhe lěto předstaja naši wuknjacy staršim a přiwuznym adwentny koncert. Tež lětsa běše ćěłozwučowarnja pjatk wječor zaso kopaće połna a šulerki a šulerjo dóstachu wulki přiklesk za jara poradźeny program. Pod nawodom knj. Hojerec, knj. Cyžoweje, knj. Ošikoweje a knj. Hejdušku su dźěći hodowne tradicije a spěwy po cyłej Europje předstajili. Kaž je nimale hižo z tradiciju, je naša staršiska band tež tónraz zaso wšitke spěwy profesionelnje přewodźała. Za to jim cyle wulki dźak. Dźakować chcemy so tohorunja pola staršiskeje rady, kotraž je so cyły wječor wo napoje a słódnu jědź postarała a zdobyty přinošk po tym šulskej nawodnicy knj. Hejdušcynej přepodała. Rjany dohodowny wječor wostanje wšěm sobuskutkowacym a přihladowarjam zawěsće hišće dołho w pomjatku. 

Lětsa woswjećichu šulerki a šulerjo 3.lětnika zaso ptači kwas. Tónraz hižo dźeń do poprawneho swjedźenja. Tónraz měještaj kwasny porik Ellena Güntherec a Anton Wawrik hnydom dweju braškow. Młodeho Franca Domašku podpěraše woprawdźity braška Fabian Hejduška, kiž złoži tučasnje swój referendariat na našej šuli.

Krasny połhodźinski program dožiwi kopaće połna hala, wšako my stajnje wšěch přiwuznych kaž tež wuměnkarjow na tradicionelny serbski swjedźeń přeprošamy. Wulki přiklesk nježnjejachu jenož 3.lětniki, ale tež holcy a hólcy ze štwórteho, wšako woni přihladowarjow z kofejom, tykancom a pomazkami pohosćichu. Po programje podachu so wšitcy do Smječkec, zo bychu tam zbrašenym wobydlerjam doma Swj. Jana tohorunja ptačokwasny program předstajili.

Wjesne sportowe hry we Worklecach

Kaž hižo loni přewjedźechmy tež lětsa zaso spočatk šulskeho lěta wjesny sportowy swjedźeń. W předpolu so najprjedy měšane mustwa wulosowachu, tak zo wobsteješe jedyn team z něhdźe 12 čłonami wot prěnjeho do štwórteho lětnika. Cil běše, sportowe stacije we wsy z pomocu kartu namakać a je přewjesć. Stacije běchu najwšelakorišeho razu: Mjetanje medicinoweho bula, slalomowy běh, łaženje na slackline, trojoskok, atd. Wučerki a wučerjo sej stajnje wuslědki cyłeho mustwa notěrowachu a tak so na kóncu tři najlěpše mustwa z medaljemi mytowachu. Zakónčili běchu wšitcy sportowy swjedźeń na kupje z kołbasku w całće, kotruž měještaj sekretarka knjeni Bulankowa a domownik knjez Šiman za wšěch spřihotowanu.

Lubi starši, 

z pomocu našeje referendarki knj. Bětnarjec chcemy srjedu, dnja 02.10.24 na našim šulskim sportnišću sponsorowy běh za dźěći w afriskim kraju Namibija přewjesć. Wšitke informacije k tomu namakaće w slědowacym flyeru. Přez Wašu podpěru so jara wjeselimy! Zapłać Bóh hižo w předpolu! 

Liebe Eltern, 

mithilfe unserer Referendarin Frau Büttner möchten wir am Mittwoch, den 02.10.24 auf unserem Schulsportplatz einen Sponsorenlauf für Kinder in Namibia durchführen. Alle Informationen dazu finden Sie im folgenden Flyer. Über Ihre Unterstützung sind wir sehr dankbar! Vielen, lieben Dank bereits im Voraus! 

steps-for-children_Flyer-2024.pdf

Krótko do zymskich prózdnin je so pola nas na šuli tradicionelne čitanske wubědźowanje w 3.lětniku přewjedło. Naša jury, wobstejaca z wjacorych wučerkow, je so na kóncu za sćěhowace zaměstnjenja rozsudźiła:

maćernorěčna skupina:

1. Hanka Wałdźic (faluje na wobrazu)
2. Wanda Matkec
3. Elias Jakubaš

skupina 2+:

1. Anton Wawrik
2. Sanne Rauer
3. Juliane Polk

WUTROBNA GRATULACIJA!!